Ален Перрен: "Ўзбекистон сафида Жепаров ва Кападзе кучли"

Унинг биринчи қисмида хитойликлар устози Алан Перрен ва ҳимоячи Занг Ченгдонг иштирок этди.

Матбуот анжуманида 50дан ортиқ ОАВ вакиллари иштирок этишди.

Хитойликларнинг келиши бироз кечикди.

- Ўзбекистонга қарши ўйиндан ўз фикрларингиз билан ўртоқлашсангиз. Учрашувга қандай тайёргарлик кўрдингиз?
- Мусобақани жуда яхши бошладик. Ўзбекистон КХДР жамоасидан кучли эканлигини кўрдик. Бу жамоа ўтган Осиё Кубогида тўртинчи ўринни олганди. Таркибдаги бир қатор футболчилар Қатардаги қитъа чемпионатида ҳам иштирок этишган. Ўзбекистон сафида 8 (Жепаров) ва 18-рақамдаги (Кападзе) футболчилар кучли. Индивидуал тарзда ўйнай оладиган ўйинчилар кўп. Рақибимизда жамоавий ўйин ҳам кучли. 2011 йил биз Ўзбекистон билан 2:2 ҳисобида дуранг ўйнагандик. Бу сафар уларни мағлуб этишга уринамиз, - дейди Алан Перрен.

Ҳимоячи Занг Ченгдонг эса дастлаб қуйидаги фикрларни билдирди: Рақибимиз кучли футболчиларга эга. Ўтган мусобақаларда жуда муваффақиятли тарзда иштирок этган. Саудия Арабистонига қарши баҳсда биз яхши ўйнаб ижобий натижага эришдик.

 - Ўтган ўйинда жамоаингиз сафида қайси футболчини энг яхши деб айта оласиз?
- Саудия Арабистони билан баҳсда барча ўйинчилар жуда яхши ўйнашди. Ҳеч бир футболчини алоҳида ажратиб кўрсата олмайман.  

- Криштиану Роналдунинг "Олтин тўп"ни қўлга киритганига муносабатингиз? Иккинчи савол Ўзбекистон ҳақида нима дея оласиз?
- Роналду ҳақли равишда "Олтин тўп"га эга чиқди. Лекин қолган номзодлар ҳам кучли эди.

Биз Ўзбекистон терма жамоасини яхши ўрганиб чиқдик. Иккинчи турдаги баҳсга тайёрмиз.

- КХДР ва Саудия Арабистони ўртасидаги ўйин олдинроқ бўлади. Ушбу учрашув натижаси Хитой ва Ўзбекистон ўртасидаги баҳсга таъсири бўладими?
- Бизнинг Ўзбекистонга қарши ишлаб чиққан режамиз бор. Шу боис фақат ўз ўйинимизга эътибор қаратамиз. Албатта учрашув натижасини билишимиз турган гап.

- 2011 йил Хитой илк турда ғалаба қозонган. Лекин гуруҳдан чиқа олмаганди. Бу сафар ҳам дастлабки турда ютуқ бўлди. Бу сафар натижа яхшироқ бўлармикин?
- Гуруҳ босқичи учта ўйиндан иборат. Агар учала ўйинда яхши ўйнасак албатта чорак финалга чиқамиз.

- Статистикага назар солсак Хитой Осиё Кубокларида Ўзбекистон билан уч марта тўқнаш келиб умуман ғалаба қозона олмаган. Бир марта дуранг ўйнаган ва икки бор ютқазган. Бу эртанги баҳсдан олдин сизларга қўшимча босим юклайдими?
- Тарих тарихлигича қолади. Биз бугунги кун билан яшаймиз. Албатта Ўзбекистон терма жамоаси ҳам кучли. Хитой эртага ғалаба қозониш учун уринади.

Нарзулла Сайдуллаев
Брисбен