Алексей Евстафеев: "Сентябрь ойида Япония ёшлари билан ўйнаймиз"

Алексей Евстафеев шогирдлари Ҳиндистон, Қатар, Туркманистон ва Непал ёшларига қарши ўйнашади.

Ахборот ҳамкоримиз "Футбол Экспресс" газетаси мухбири Евстафеевдан тайёргарликлар борасида интервью олди.

- Осиё чемпионати саралаш баҳслари бошланишига оз вақт қолмоқда. Терма жамоанинг тайёргарлиги қандай кетмоқда?
- Тайёргарликни режа бўйича олиб бораяпмиз. Августда Дукентда йиғин ташкил этдик. Сентябрь ойида Япония ёшлар терма жамоаси Тошкентга келади. Уларга қарши иккита ўртоқлик учрашуви ўтказамиз. Саралашда иштирок этадиган таркибни деярли аниқлаб олдик. Японияга қарши ўйинлар орқали йигитларнинг имкониятларини яна бир бор текшириб оламиз.

- Гуруҳдаги рақибларни ўрганиш жараёни қандай кетаяпти?
- Қатардан ташқари гуруҳдаги бошқа рақибларимиз тўғрисида ҳеч нима билмаймиз. Ёдингизда бўлса, баҳорда Қатарда ташкил этилган мусобақада иштирок этиб мусобақа мезбонлари билан куч синашгандик. Шу боис Қатарнинг қандай ўйнашини биламиз.