Александр Хомяков: "Ҳужумда муаммоларга дуч келяпмиз. Хавфли вазиятлар деярли яратмадик"

- Барчасини ўзингиз кўрдингиз. Мавсум аввалида жадвалнинг юқори қисмида бўлиши тахмин қилинмаган жамоалар иштирокидаги баҳс бўлди. Якунда улар биздан кучлироқ бўлиб чиқишди. Биринчи даврада улар ғалабага эришишди, бугун эса очко ишлаб кетишди. Улар яхши ўйин кўрсатиб, бунга эришишди. Гарчи жамоаси ёш бўлишига қарамасдан, уларда сезиларли ўсиш бор. Шу сабабли "Сурхон" бекорга 6-ўринни эгаллаб тургани йўқ.

Ўйин бобида нима дейишим мумкин... Ғалабадан умид қилгандик, аммо ҳужумда муаммоларимиз борлигини кўрдик. Хавфли вазиятлар деярли яратмадик, бошни чангаллайдиган вазиятимиз бўлмади. Кейин бор умидимиз стандартларга қаратгандик, аммо бундан ҳам самара чиқмади. Рақиблар яхши ҳимояланди. Рақибларнинг асосий ютуғи - жуда тезлик билан қарши ҳужумга ўтиши. Бир вазиятда гол бўлмади, дарвозабонимиз сэйв намойиш қилди. Умуман олганда, рақибларнинг тезкор юришларини тўхтата олдик. Улар ўйиннинг катта қисмини ҳимояда ўтказишди. Ўзи ўйинда вазиятлар кўп ҳам бўлмади. Баҳсда курашлар, яккакурашлар кўпроқ бўлди. 

- Бубанья нега ўйнамади?

- У жуда кўп ўйинларни ўтказиб юборди. Унинг жароҳати бор эди. Ҳозир тикланиш жараёнида. Ҳозирча унинг ҳолати шундай. Яқин вақтларда у машғулотларга киришади ва барчамиз уни кўрамиз.

- Армин Бошнякни қачон майдонга туширасиз?

- У кечагина келди. Уни фақатгина кеча кўрдик. Менга кўпроқ ҳужумда ўйнайдиган футболчилар керак. Бизда қанотда креатив ўйнайдиган вингерлар жуда ҳам етишмаяпти. Умид қиламанки, у ҳам Хебайга ўхшаб, тезда жамоага мослашиб кетади ва жамоага ёрдам беради. Гарчи қаттиқ истаб, ҳаракат қилган бўлсак-да, мухлисларимизни хурсанд эта олмадик. Хатоларни кўриб чиқиб, улар устида ҳулоса чиқариб, навбатдаги ўйинларда ғалаба қозонишга ҳаракат қиламиз.

- Жамоа кетма-кет иккинчи ўйин 0:0 ҳисобини қайд этди.

- Биласизми, "Сурхон" жуда яхши жамоа ва уларни ютишни қаттиқ истагандик. Ёш жамоа, ёш таркиб. Улар ҳар томонлама ўзларини кўрсатишга ҳаракат қилишмоқда. Шу сабабли бугун рақибдан кучлироқ бўлишни истагандик. "Насаф" билан ўйнаш бироз оддийроқ. Нима сабабдан, "Насаф"нинг босимини барча яхши билади. Мухлисларимиз биздан ғалаба кутишини билгандик. Бу ўйиндан кўпроғини кутгандик. Ҳозир айтганимдек, улар бекорга жадвалнинг юқори қисмида эмас. Улар мавсумда 4 марта мағлуб бўлишди, бу ҳам ниманидир исботлайди. Яъни, улар қандай футбол ўйналиши кераклигини билишади. Ўтган турда рақиблари уларга йўл очиб беришса, қандай муаммолар келтириб чиқаришини кўрсатишди.

- Захирадан майдонга тушган Саидумар Содиқов ўйинга унчалик киришиб кета олмади.

- Яна бир марта такрорлайман. Биз ҳужумкор футболчиларнинг ўйинида муаммолар ҳис қиляпмиз. Бизга бироз бошқачароқ турдаги ярим ҳимоячилар керак. Шу сабабли ёшлар жамоасидаги футболчиларни асосийга жалб қиляпмиз. Энди ҳеч нимани баҳона қилмаймиз. Ишлашда давом этамиз. Қаранглар, бугун таркибда неча нафар маҳаллий футболчилар ўйнади? Бу ҳам ўйиндаги ижобий ҳолатлардан бири. 8-9 нафар маҳаллий футболчи майдонга тушди.