Александр Мочинов: «Футболчиларимиз матонат кўрсатишди»

«Бугунги ажойиб ўйин учун рақибимизга миннатдорчилик билдираман. КХДР нафақат гуруҳнинг, балки бутун турнирнинг фаворитлари қаторида бежизга тилга олинмади. Бугунги ажойиб ғалаба учун ўз шогирдларимга ҳам миннатдорчилик билдираман. Кучли рақибга қарши муносиб ва ажойиб ўйин кўрсатдик ва ғалаба қозондик», - дейди Мочинов ўйиндан кейинги матбуот анжуманида.

«Шу ўринда, бизни ўйингача қўллаб-қувватлаб турган ва далда бериб турган барча инсонларга ҳам раҳмат айтмоқчиман. Кеча, хабарингиз бўлса Тошкентда миллий терма жамоамиз Янги Зеландияни ўртоқлик учрашувида мағлуб этди. Ушбу ўйиндан сўнг, миллий терма жамоа футболчилари ҳам телефон орқали боғланиб бизга ўйинда омад тилашди. Бундан ҳурсанд бўлдик. Бизни ўйин давомида стадионнинг ўзидан қўллаб қувватлаш учун Ўзбекистондан ташриф буюрган мухлисларимизга эса алоҳида раҳмат. Уларни хурсанд қилишимиз шарт эди», - дейди Ўзбекистон ўсмирлари бош мураббийи.

Александр Мочинов шунингдек, ўйиндан олдин шимолий кореялик футболчиларнинг ўйинини томоша қилгани ва улар жуда ҳужумкор ўйин кўрсатишини таъкидлаб ўтди.

«КХДР терма жамоасининг ҳужум чизиғи жуда кучли. Рақибнинг илк 15 дақиқадаги босимига дош беришимиз керак эди. Аммо, барибир жуда эрта ўз дарвозамиздан тўп ўтказиб юбордик. Шундай бўлсада, тезда ўзимизни ўнглаб олдик ва хатто биринчи бўлимни ўз фойдамизга ҳал қилиб чиқиб кетдик. Футболчиларимиз ўз матонатлари ва маҳоратлари эвазига бугун ғалаба қозонишди. Биз бу учрашувни ҳам тезроқ унутиб Кувайтга қарши бунданда яхшироқ тайёргарлик кўришимиз керак», - дейди Мочинов.