Александр Гейнрих: "Футболда шошиб хатога йўл қўймаслик керак"

"Терма жамоага қайтганимдан хурсандман. Тўғрисини айтсам, мухлисларни ўзим ҳам соғингандим, голим уларга совға бўлди деб ўйлайман. Биринчи ўйинда қийин бўлди, гап рақибнинг кучида эмас, янги мураббий қўл остида бор-йўғи тўрт кун машғулот ўтказдик. Самвел Бабаяннинг биздан нимани талаб қилаётганини тўлиқ англаб етиш учун бироз вақт керак. Кейинги ўйинларда ўзимизни янада яхши ҳис қилишимизга ишонаман", - дейди Гейнрих.

- Ямандан бугун кутилганидан анча яхши ҳаракат қилди. Бундай ўйинни улардан кутганмидингиз?
- Бор эътиборни ҳимояга қаратишларини билардик. Бундай ўйинларда бироз қийин бўлади. Бунинг ечими тезкор гол, аммо биз биринчи бўлимда вазиятлардан фойдалана олмадик. Лекин бари яхшилик билан тугади.

- Ўйлашимизча, бугун Яман ўз савиясидан бир калла устун ўйнади, биз ҳам ўз имкониятимиздан юқорироқ ҳаракат қилишимиз мумкинми?
- Мумкин албатта. Бунинг учун шошмаслик керак, хато кўп бўлади. Футболчиларимиз минглаб йиғилган мухлислар олдида тезроқ гол уришимиз керак деб шошдилар. Аксинча, бундай ишларни хотиржам бажариш керак. Шунда унум бўлади. Иккинчи бўлим арафасида ёшларга шуни таъкидладим. Ўз навбатида Филиппин билан ўйинда янада яхшироқ ҳаракат қилишга ваъда берамиз.