Дохадан мухбиримиз хабар беради: “Ал-Ҳилол” бугунги ўйинга таркиб йиғолмай қолиши мумкин

Қатардаги мухбиримизнинг хабар беришича, ҳозирда “Ал-Ҳилол”нинг қайдномасида 13 нафар соғлом футболчи бор: улардан 3 нафари дарвозабон, қолганлари эса майдондаги ўйинчилар. Саудияликлар 6-тур доирасида ўтадиган “Шабаб Ал-Аҳли”га қарши учрашувни қолдиришни сўраб, ОФКга мурожаат қилишган, аммо уларнинг навбатдаги илтимоси ҳам рад этилди.

Шу боис, “Ал-Ҳилол”нинг олдида иккита йўл қолган, биринчиси, учрашувдан бош тортиб, мусобақадаги иштирокини якунлаш. Иккинчиси эса захирадаги дарвозабонлардан бирини ўйновчи футболчи сифатида қайдномадан ўтказиш.

“Ал-Ҳилол” мусобақадаги иштирокини якунласа, жамоанинг барча натижаси нолга тенглаштирилиши ва “Пахтакор” 1-ўрин билан кейинги босқичга чиқиши ҳақда олдинроқ хабар бергандик. 

1. "Пахтакор" – 7 очко

2. “Шабаб Ал-Аҳли” – 7 очко

3. “Шахр Ходро” – 0

Ҳозирча, саудияликлар қандай қарорга келгани маълум эмас. Воқеалар ривожини кузатишда давом этамиз.

Айни пайтга келиб "Ал Ҳилол"нинг жами 19 нафар футболчисида коронавирус аниқланди. Булар:

Дарвозабонлар: Муҳаммад Вакид, Абдуллоҳ Ал Жадани, Наваф Ал Ғамди.

Ҳимоячилар: Муҳаммад Ал Бурайк, Ёсир Ал Шаҳрони, Абдуллоҳ Ал Ҳафиз, Мутеб Ал Муфарриж, Али Ал Булайҳи, Муҳаммад Жаҳфали, Муҳаммад Кунайдири.

Ярим ҳимоячилар: Салмон Ал Фараж, Ҳамад Алабдан, Наваф Ал Обид, Салим Ал Давсари, Муҳаммад Канно, Носсир Ал Давсари.

Ҳужумчилар: Себастьян Жовинко, Салоҳ Шеҳри, Бафетимби Гомис.

Коронавирусдан даволаниб сафга қайтганлар: Салмон Ал Фараж, Ҳамад Алабдан.

Эслатиб ўтамиз, "Ал Ҳилол" - "Шабаб Ал Аҳли" баҳси бугун, 23 сентябрь куни маҳаллий вақт билан 21:00 (Тошкент вақти билан 23:00)да старт олади. Беллашув Доҳадаги "Khalifa International Stadium"да бўлиб ўтади. 

"Ал-Ҳилол" иштирокини давом эттирса, "А" гуруҳи пешқадами сифатида кейинги босқичда "B" квартетидаги иккинчи жамоа ("Ал-Шорта" ёки "Истиқлол")га қарши тўқнаш келади.