Акмал Холмуродов - "Динамо"нинг 2018 йилги энг яхши футболчиси!

Клуб расмий сайтида «Сизнингча, «Динамо» жамоасининг 2018 йилдаги энг яхши футболчиси ким?» сўровномасида энг кўп овоз тўплаган футболчи – Акмал Холмуродов бўлди. Мавсумнинг иккинчи қисмига таркибга қўшилган ҳимоячи жамоанинг ҳимоя қўрғони етакчиси сифатида тўп суриб, муҳим голларга ҳам муаллифлик қилди. «Динамо» жамоасининг турнир жадвалида энг кам гол ўтказиб юборган Про-Лиганинг энг яхши ҳимоя чизиғига эга бўлишида Холмуродовнинг ҳиссаси катта бўлди. Сўровномада Акмал Холмуродов 133 та овоз (38.7%) тўплаб, «Динамо»нинг 2018 йилги энг яхши футболчиси» номига лойиқ кўрилди.

Иккинчи ўриндан жамоа яримҳимоячиси Жасур Азимов жой олди. Самарқандлик футболчига 129 та (37.5%) овоз берилди. Азимов ҳам мавсум давомида «Динамо»нинг фаол футболчиларидан бири сифатида тўп суриб, жамоанинг ғалабаларига муносиб ҳисса қўшди. Қайд этиш керак, Азимов 2017 йилда «Динамо»нинг энг яхши футболчиси» деб топилганди.

Сўровномада учинчи ўриндан 28 (8.1%) овоз билан Илҳом Юнусов ўрин олган. Самарқандлик тажрибали яримҳимоячи мавсум давомида жамоадошларига намуна бўла олди ва бир қатор ўйинларда муҳим голлари билан жамоага наф келтирди.

Шунингдек, мухлислар йил давомида яхши ўйинлари билан ёдда қолган Дамир Темиров 24 (7%), Отабек Нарзуллаев 18 (5.2%), Шоҳруҳ Эшбўтаевларга 12 та овоз (3.5%) беришган. Сўровномада жами 344 та овоз берилган.

Эслатиб ўтамиз, 2007 йилдан буён клуб матбуот хизмати томонидан сўровнома орқали аниқланиб келинаётган «Динамо»нинг «мавсумдаги энг яхши футболчиси» номига қуйидаги футболчилар лойиқ кўрилган:

«Динамо»нинг «йил футболчиси» номинацияси ғолиблари:
2007 йил – Фарҳод Тожиев
2008 йил – Илёс Қурбонов
2009 йил – Баҳодир Насимов
2010 йил – Илҳом Юнусов
2011 йил – [Дэвид Ония]
2012 йил – Иван Нагаев
2013 йил – Андрей Мельничук
2014 йил – Андрей Мельничук.
2015 йил – Камолиддин Мурзоев.
2016 йил – Амиржон Сафаров.
2017 йил – Жасур Азимов.
2018 йил – Акмал Холмуродов.