Акмал Рустамов: "Пахтакор"нинг омади келди"

- Ўйин ҳақида фикрларингиз?

- Янги бошланган чемпионат билан барчани табриклайман. Бугун шиддатли ўйин бўлди деб ўйлайман. "Пахтакор"да ҳам бизда ҳам кўплаб яхши вазиятлар бўлди. Лекин бизда вазиятни якунлаш йўқ. Агарда вазиятларимиздан гол урганимизда бошқача ўйин бўларди. Лекин улар голлар уришди, биз эса йўқ. "Пахтакор"га омад кулиб боқди, жамоа мухлисларини табриклайман. 

- Бугун "Қизилқум" рақибга яхши қаршилик кўрсатди. Умуман олганда жамоа мавсумга яхши тайёргарлик кўрди. Сиз таркибдан қониқдингизми? Чунки олдинда тақвим жуда тиғиз, чемпионат ва кубок ўйинлари тезда ўтказилади.

- Таркибимиз яхши. Таркибни ёшлар билан тўлдиряпмиз. Ёшлар жамоамиздан футболчилар етишиб чиқяпти. Ўзим бунгача U21 жамоада ишлаганман. Йигитлар тайёр бўлса, асосий жамоага қўшиб борамиз. Бизда таркибдан муаммо йўқ. Тайёргарликка келадиган бўлсак, буни яхши олиб бордик. Бу тўрт босқичдан ташкил топди. Декабрь ойида Навоийда йиғилдик, кейин машғулотларни Тошкентга кўчирдик. Навбатдаги босқичда Туркиянинг Анталия шаҳрида тайёрландик. Тайёргарлик ва таркибимиздан кўнглимиз тўлди. Чемпионат узоқ давом этади. Ҳозир бир нима дейиш қийин. Шуни айта оламан, биз тепа ўринлар учун курашамиз.

- Жамоа 7та назорат ўйинида 11та гол урган. Бу ёмон натижа эмас. Лекин жамоа кўп гол ҳам ўтказиб юборибди. Бугун жамоага нега сермаҳсуллик етишмади ёки жамоа дуранг учун келганмиди?

- Суперлигадаги бирор мураббий дуранг учун ўйнамаса керак. Бизда ўйинга қўйилган аниқ тактикамиз бор эди. Иккинчи бўлимда иккита юз фоизлик вазиятлардан голлар ура олмадик. Агарда голни урганимизда ўйин бошқача бўларди. Реализация бизда оғриқли нуқта бўлиб турибди. Бу бўлмагандан кейин сен урмасанг, сенга уришади. Бугунги ўйинда шунақа бўлди. 

- "Қизилқум" раҳбарияти жамоа олдига қандай вазифалар қўйган?

- Биринчи навбатда барча мураббий каби жамоаси билан биринчи ўринда бўлишни ёки юқори ўринлардан бирини эгаллашни хоҳлайди. Раҳбариятимиз бизга кучли бешликка кириш вазифасини қўйган. Биз эса буни ундан зиёдроқ қилишга, тўртинчи ўринни эгаллашга ҳаракат қиламиз.

- Клуб ушбу трансферлар ойнасида нега фаол бўлмади? Ёки таркибдан кўнглингиз тўқмиди?

- Таркибдан кўнглим тўқ. Кейинги ўйинлар учун камчиликларни ўрганишга, тахлил қилишга ҳаракат қиламиз. Бугун "Пахтакор"га ютқазадиган ўйин бўлгани йўқ. Кейинги ўйинлар учун камчиликларни тўғриласак, барчаси яхши бўлади.

- Ўйин олдидан клуб президенти жамоа билан йиғилиш ўтказди ва ўша пайтда мана шу бешинчи ўрин вазифаси айтилдими?

- Йўқ, ундай эмас. Ўтган йили қабул қилиб олганимизда, жамоани 14-ўриндан 6-ўрингача кўтаришга имкониятимиз бор эди. Қаердадир ўйинимиз чиқмади, дуранглар кўпайиб кетди. Лекин ўшанда барчасини кўриб чиқиб, кимга кучимиз етишини, кимларга кучимиз етмаслигини ҳисобга олиб, ҳаракат қилгандик. Бу футбол. Агарда ўз очколаримизни олганимизда, олтинчи ўрингача кўтарила олардик. Аммо ишлар ўхшамай, тўққизинчи ўринга тушиб қолдик. Шу йил "Қизилқум" жамоасининг кучини кўрасизлар деган умиддаман.

- Ислом Кенжабоевни захирага олаётган пайтингизда Сиз ва футболчи ўртасида суҳбат бўлди. Шу ҳақда сўрамоқчи эдим.

- У эътироз билдирмади. Биринчи ўйин бўлгани учун футболчиларда томир тортишиш ҳолатлари бўлди. Захирада унинг ўрнини боса оладиган футболчилар бор. Айтганимдек, таркибимиз яхши ривожланган. У ўзини 70-80 дақиқа яхши кўрсатди ва бир қанча вазиятлари ҳам бўлди. Аммо исталган футболчи тўлиқ ўйнашни истайди. Лекин унинг соғлиғи ўйин охиригача етмаслигини билиб, бошқа футболчини туширгандик. Аммо алмаштириш иш бермади.

- Йиғиндаги интервьюлардан бирида Сиз марказни кучайтириш кераклигини ва бир қанча хорижлик футболчилар билан музокаралар олиб борилаётганини айтгандингиз. Клуб кимлар билан музокаралар олиб борганди? Натижалар қандай бўлди?

- Сербиялик яхши легионер билан музокаралар олиб боргандик. Лекин у биз айтган маблағга Ўзбекистонга келишни истамади. Кейин эса унинг жойига ёш футболчиларни тайёрлаш бўйича мураббийлар билан келишиб олдик.

- Дастлабки 5 турда жамоалар қувноқ ўйин кўрсатишади. Айнан ушбу ўйинлар "Қизилқум" учун ҳал қилувчи аҳамият касб этади десак бўладими?

- Жамоанинг қишки тайёргарлиги жуда муҳим. Агарда қишки йиғиндан мураббийнинг кўнгли тўлса, мавсум якунига қадар ишлар яхши кетади. Ҳозир кимдир кучли ёки кучсиз деб бўлмайди. Барча жамоалар яхши футбол ўйнамоқда. Майдонга тушиш ва жанг қилиш керак. Сизларга ҳам футболчиларга ҳам раҳмат айтаман. Бугун 2:0 ҳисобида мағлуб бўлдик. Лекин келгуси ўйинларда мухлисларни ҳам раҳбариятни ҳам хурсанд қилишга интилмиз.