Акбар Тўраев: "Дубайдаги йиғин яхши бошланди"

Куни кеча "қалдирғочлар" Россия премьер-лигасида иштирок этаётган "Анжи" клубига қарши ўртоқлик учрашувини ўтказиб 3:2 ҳисобида зафар қучишди. Биз "Бунёдкор" дарвозабони Акбар Тўраев билан боғланиб йиғин ва "Анжи"га қарши баҳс ҳақидаги фикрлари билан қизиқдик.

"Дубайдаги йиғин режага кўра бошланди. Кунига 2 маҳал машғулот ўтказаяпмиз. Эрталабки машғулотлар асосан қумда бажарилмоқда, жисмоний ҳолатни яхшилашга эътибор қаратилмоқда. Кечки пайт "Ал Шааб" академиясига қарашли майдонда шуғулланаяпмиз. Тактика машғулотлар ўтказилмоқда. Таркибда ҳеч қандай йўқотиш йўқ, барча соғ-саломат. Барча машғулотларда бор кучи билан ишламоқда".

"Анжи" билан ўйинга келсак мураббийлар бу ўйинда барча футболчиларга имкон беришди. Ҳар бир бўлимда икки хил таркиб ўйнади. Менимча ўйин ёмон бўлмади. Мураббийларнинг кўрсатмаларини бехато бажаришга уриндик. Қувонтираётгани ёшлар ҳам жамоага тезда қўшилиб кета олишди. Улар ҳам асосий таркибга лойиқ эканликларини кўрсатишмоқда. Олдинда яна 5та назорат ўйини бор. Барча эътибор 9 февраль кунги "Ал Шабаб"га қарши ўтадиган плей-офф ўйинига қаратилган", - дейди Акбар Тўраев.