АГМК матбуот анжуманига таклиф этади

Бугун, 10 февраль куни 01:45да АГМКнинг ОЧЛдаги рақиби “Истиқлол” (Душанбе) жамоаси Истанбул - Тошкент йўналиши орқали юртимизга етиб келди. 12 февраль куни Олмалиқ шаҳрида бўлиб ўтадиган Осиё чемпионлар лигаси иккинчи саралаш босқичида ўйнадиган АГМК ва “Истиқлол” клубларининг ўйиндан аввалги машғулотлари ҳамда матбуот анжумани вақти аниқ бўлди. 

Бугун ҳар икки жамоанинг машғулоти Олмалиқ шаҳридаги ОКМК спорт мажмуасида бўлиб ўтади. АГМК ўз машғулотини 11:00да бошлайди. Меҳмон жамоа машғулоти 16:00да бошланади. Ҳар икки машғулотнинг дастлабки 15 дақиқаси ОАВ вакиллари учун очиқ. 

Эртага иккала жамоа бош мураббийлари иштирокида ўйинолди матбуот анжумани ўтказилади. Матбуот анжумани Тошкент шаҳридаги “Lotte” меҳмонхонасининг “Регистон” залида бўлиб ўтади. Матбуот анжуманида дастлаб 11:30да “Истиқлол” бош мураббийи Ҳаким Фузайлов иштирок этса, 12:00дан бошлаб АГМК устози Миржалол Қосимов журналистлар саволларига жавоб қайтаради. 

11 февраль кунги машғулотлар Тошкент шаҳридаги “Жар” стадионида бўлиб ўтади. 11:00да АГМК ва 16:00да “Истиқлол” ўйинолди расмий машғулотини ўтказади. Машғулотнинг дастлабки 15 дақиқаси ОАВ вакиллари учун очиқ. 

Эслатиб ўтамиз, АГМК ва "Истиқлол" ўртасидаги ОЧЛ баҳси 12 февраль куни Олмалиқ шаҳридаги ОКМК спорт мажмуасида бўлиб ўтади. Учрашув 16:00да бошланади. 

(Эртанги матбуот анжуманидан кейин рўйхатдан ўтган ОАВ вакилларига ОЧЛ аккредитация карточкалари тарқатилади)