Абдуқаҳҳор Маъруфалиев: "Навоий сафарига Одилов ва Абдужабборов бора олишмайди"

Жамоа мураббийларидан бири Абдуқаҳҳор Маъруфалиев билан суҳбатимиз мазкур учрашувга тайергарлик ҳақида бўлди.

- Чемпионатда енгил учрашувнинг ўзи йўқ, барча жамоалар майдонга фақатгина ғалаба иштиёқида тушишяпти. Шу маънода Навоийда кечадиган ўйин ҳам биз учун қийин бўлади. Ўтган мавсум "Қизилқум" билан сафарда дуранг қайд этгандик. Бу мавсумни навоийликлар жуда яхши бошлашди. Айни пайтда пешқадамлар сафида бораяпти. Албатта, бу нарса бизни чўчитмаслиги керак. Футболчиларимиз руҳиятини ўйинга мослай олсак, ижобий натижага эришишимиз мумкин. Жамоамизда афсуски йўқотишлар бор. Навоий сафарига "Насаф"га қарши ўйинда жароҳат олган марказий ҳимоячимиз Дониёр Одилов, қанот ярим ҳимоячимиз Саиджон Абдужабборов бора олишмайди.

Саид "Олмалиқ" билан кубок ўйинида жароҳатланди. Дониёр алоҳида шуғулланишни бошлади. Абдужабборов ҳам, Одилов ҳам кейинги тургача сафга қайтишига умид боғлаб турибмиз.

Ўтган куни ҳужумчимиз Жасур Ҳакимовнинг, кеча эса тўпураримиз Зохид Абдуллаевнинг туғилган куни бўлди. Йигитларнинг ҳар иккаласини жамоадошлар таваллуд айеми билан табриклашди. Кўз тегмасин, ҳужум чизиғимиз вакиллари бу йил ўзларига билдирилган ишончни оқлаяпти. Уларга мустаҳкам соғлик тилаш баробарида янада сермахсул, ҳужумкор ўйинларини кутиб коламиз.

Навоий сафарига ёшлар таркибимиз ҳам, асосий таркибимиз ҳам бугун жўнаб кетади, - дейди Абдуқаҳҳор Маъруфалиев.

"Металлург" матбуот хизмати