Абдумавлон Абдужалилов: "Бухоро" бизнинг хато қилишимизни кутди, улар осон рақиб эмас"

- Ўйин ҳақидаги таассуротларингиз билан ўртоқлашсангиз...

- Бугунги ўйин яхши эмоциялар билан эсда қолди. Ўйин қийин ўтди, сабаби мағлубиятдан кейин шундай жараён бўлишини билардик. Энг муҳими, охиригача курашдик. Менимча, ғалабага ҳақли ўйин намойиш этдик. 

- Бугун ўйин давомида "Бунёдкор"да эҳтиёткорлик ҳаддан ортиқ кузатилди. Бунга сабаб нима?

- Бу охирги ўйин билан боғлиқ деб ўйлайман. Оддий ввазиятларда хатоларга йўл қўйгандик. Хато устида ишлаш деганда, уларни такрорламасак назарда тутилади. Ўйлашимча, рақиб жамоа ўйини бизнинг кутиш асносида қурилганди. Хато қилсак, қарши ҳужум ташкиллаштиришга уринишди. Уларга имконият бермаслик учун эҳтиёткор ўйин намойиш этишга мажбур бўлдик. 

- "Бухоро"ни "Бунёдкор" учун қулай рақиб дейишимиз мумкинми? Сабаби, Суперлигадаги икки ўйинда, қолаверса, кубок беллашувида "қалдирғочлар"нинг қўли баланд келди?

- Суперлигада ҳеч қайси жамоа бир-бирига қулай рақиб ҳисобланмайди, сабаби пешқадамлар оддий ўйинларда очко йўқотишмоқда. Охирги ўриндаги жамоалар юқори ўриндагилардан очко тортиб олишмоқда. "Бухоро" билан ўйинларимизни қарайдиган бўлса, икки ўйинда охирги дақиқаларда урилган голлар эвазига ғалаба қозондик. 3:0, 4:0 ҳисобларида ютқазган жамоани осон рақиб дейиш мумкиндир, "Бухоро"га нисбатан бу таърифни ишлатиб бўлмайди.