Абдулла Бўриев: "Учинчи ўринни олишга ҳаракат қиламиз"

Ўйин якунлангач “Бунёдкор” клуби ўйновчи бош мураббийи Абдулла Бўриев ўз фикрларини билдирди.

“Биринчи муваффақиятсиз ўйиндан кейин йигитлар ўзларига келиб олишди. Хатолардан тўғри хулоса чиқардик ва бугун чиройли ғалабани қўлга киритдик. Ўйинчиларим ўзларининг кучларини, жамоавий яхши шаклланганликларини исботлашди. Бугун бизда учрашувга тайёргарлик яхши эди. Агар шу ўйинимизни сақлаб қолсак, якшанба куни ҳам албатта ғалаба қозонамиз деб умид қиламан”, - дейди Абдулла Бўриев.

Эслатиб ўтамиз, бугун, 6 апрель куни соат 15:00да Ўзбекистон спорт мажмуасида бўлиб ўтадиган “Турон-С” – “Бунёдкор” учрашуви ғолиби мамлакат чемпионатининг бронза медалларига эга чиқади. Кеча “Локомотив” клуби чемпионликни расмийлаштирганди. Бугун совриндорларни тақдирлаш маросими бўлиб ўтади.


Толибжон Қосимов.