Абдесаммад Муҳаммад: "Франция ўз тарихида биринчи маротаба мундиалда иштирок этмоқда, аммо бизда қўрқув йўқ"

"Таиланд кучли жамоа эканлигини билардик. Бугун рақибимиз яхши ўйин намойиш этди. Таиланднинг Осиё кубогидаги, шунингдек Хорватия ва Кубага қарши ўйинларини ўрганиб чиққандик. Улар Бразилияга мағлуб бўлишди, аммо "пентакампеон"ларга қарши ўйинда Таиланд ўзининг тўлиқ салоҳиятини намойиш эта олмагани аниқ. Биз ақлли ўйнадик. Бугун ғалабага лойиқ эдик деб ўйлайман. Бутун жамоа ажойиб ўйин намойиш этди, айниқса дарвозабонимиз.

Чорак финалдаги рақибимиз Парагвай терма жамоасининг бир нечта футзалчилари Европа клубларида фаолият олиб боришади. Клубдаги фаолиятимда парагвайлик футзалчилар билан тўқнаш келганман. Кейинги учрашувимиз ҳам жуда қизиқарли ва томошабоп бўлиши аниқ. Икки жамоа ҳам фақатгина ғалаба учун майдонга чиқади. Биз ярим финал йўлланмасини қўлга киритишимизга ишонаман.

Франция ўз тарихида биринчи маротаба Жаҳон чемпионатида иштирок этмоқда, шу сабабли ҳар тўрт йилда мундиалда қатнашадиган бошқа жамоаларни ҳурмат қилишимиз керак. Бизда қўрқув йўқ. Ҳар бир жамоага қарши ўйнаса бўлади. Чорак финал ҳам ёмон натижа эмас, агар янада узоқроққа бора олсак бу биз учун бонус бўлади" - дейди бугунги учрашувнинг энг яхши ўйинчиси Абдесаммад Муҳаммад.

Абдулвосит Бектемиров суҳбатлашди

Франция Таиландни мағлуб этди. Жаҳон чемпионатида осиёлик жамоалар қолмади