2010/11-йилги мавсумдан буён "Реал" ЕЧЛда 9, Испания Кубогида эса 4 марта ярим финалга етиб борди

 Яна бир бор февраль ойида, яна Қирол Кубогида. Охирги бир неча мавсумдан буён "қироллик клуби" бу мусобақада мухлисларини хурсанд қила олмаяпти.

Анчелотти жамоаси масумдаги илк трофейни қўлга киритганидан икки ҳафта ўтиб, Кубок плей-оффининг учинчи босқичида иштирокини якунлади. Суперкубок финалида айнан "Атлетик" таслим этилганди.  

"Реал Мадрид" мавсумдаги иккинчи мағлубиятини тан олишга мажбур бўлди (биринчиси Ла Лигада "Хетафе") ва "Эльче" билан дурангни инобатга олсак, қаторасига иккинчи учрашувда ғалаба қозона олмаяпти. 

Аслини олганда 2010/11 йилги мавсумдан буён, "қаймоқранглилар" Қирол Кубогидан кўра, ЕЧЛ ярим финалида икки баробар кўп иштирок этишди. Сўнгги 12 йилда "Мадрид" 4 бор Кубок ярим финалига чиқишни уддалади ва икки бор бош соврин соҳибига айланди: 2010/11 ва 2013/14 мавсумларда.

Ана шу вақт оралиғида "Мадрид" 9 марта Европа Чемпионлар Лигаси ярим финалига чиқишни уддалади ҳамда 4 бор бош совринни қўлга киритди. Қирол Кубоги Зинедин Зидан "қироллик клуби" ютмаган ягона соврин бўлиб қолди.

"Мадрид" ҳам, ПСЖ каби Кубокда омадсизликка учради. Парижликлар "Ницца"га имкониятни бой берган бўлса, "Мадрид" — Бильбаонинг "Атлетик" клубига ютқазиб қўйди. Тўртинчи имкониятдан Марселино Гарсия Тораль жамоаси пойтахтликларни таслим этди.