Фарҳод Тожиев: "Аввалгидек кетма-кет голлар уришга умид қиламан"

"Бугунги учрашув биз учун оғир кечди. Ўтган турда “Хоразм”ни йирик ҳисобда мағлуб этганлигимиз туфайли бугун жамоамиздаги ёш футболчилар нима учундир бир оз сустроқ ҳаракат қилишди.

Рақибларимиз “Истиқлол” жуда яхши жамоа, футболчиларининг даражаси бир хил. Бундай жамоаларда бир футболчи жароҳат олса ёки бошқа сабаблар туфайли майдонга туша олмаса, бошқа шериги унинг ўрнини тўлдириб кета олади. “Сурхон”да ўйнаётган ёш футболчиларда ўзларига бўлган ишонч етишмаяпти. Бу ҳолатни машғулотларда мураббийлар ҳамда тажрибали футболчилари биргаликда тушунтириб бормоқдамиз.

Ўйлайманки, “Сурхон” келажакда  жуда кучли жамоа бўлиб етишади. Бугунги учрашув шу ҳисобда якунланганлиги биз учун жуда ачинарли хол, биз ўз олдимизга юқори мақсадларни қўйганмиз, ёш футболчиларимизда ўзларига бўлган ишончни шакллантирсак, ҳаммаси яхши бўлади.

Мухлисларимизга сабр тилайман, бирданига  юқори натижага эришиб бўлмайди. Мухлисларни тушунаман, улар жуда талабчан бўлишади. Мен мухлисларидан илтимос қилардим, озроқ сабр қилинглар, ҳали ҳаммаси яхши бўлади. Шахсан ўзим жароҳатим туфайли тўлиқ тикланишга улгурмаган бўлсамда, "Сурхон" учун майдонга тушиб, астойдил ҳаракат қилаяпман.  Ғалаба қозониш фақат тажрибали футболчиларга боғлиқ эмас, футбол жамоавий ўйин, ҳамманинг ўзига яраша вазифаси бор.

Сурхондарёлик футбол мухлисларига керак бўлса сафардаги учрашувларга бориб, ҳар доим бизни қўллаб-қувватлагаб келаётганликлари учун миннатдорчилик билдираман.  
Ушбу мавсумда мени жароҳатлар кўп безовта қилди. Футболчи жароҳат олганидан сўнг майдонга қайтиб бирданига яхши ўйнаб кетиши қийин, тикланиши, ўз ўйинини топиб олиши учун бир оз вақт керак бўлади. Мен ҳам ҳозирча ўз ўйинимни топиб олганим йўқ, ўзим учун ҳам бу хол ачинарли албатта. Қайси лигада тўп сурган бўлсам жамоам ғалабаси учун ўз ҳиссамни қўшганман, голлар урганман. Энди янада кўпроқ ишлаяпман, ҳаммаси яхши бўлишига, аввалгидек кетма-кет голлар уришимга умид қиламан", - дейди Фарҳод Тожиев.    
 

Бекзод Толибов ёзиб олди.

“Сурхон” матбуот хизмати билан хамкорликда тайёрланди.