«Севинч» мини футбол бўйича 13-марта Ўзбекистон чемпионлигини қўлга киритди!
19 мар 2017 21:40
Янгиликлар

«Севинч» мини футбол бўйича 13-марта Ўзбекистон чемпионлигини қўлга киритди!

Бугун мини футбол бўйича XIII Ўзбекистон чемпионати 3-босқич учрашувлари давом эттирилди. «Севинч» Ғузорнинг «Шўртан Lady» жамоасига қарши майдонга тушди.

Кичик воҳа дербиси мақомига эга учрашувда ғолиб жамоа, мини футбол бўйича, бу йилги чемпионликни қўлга киритиши мумкин эди. Чунки, «Севинч» ҳам «Шўртан Lady» жамоаси ҳам ҳал қилувчи босқич учрашувларининг барчасида ғалаба қозонишган эди.

Учрашув кутилганидек, жамоамиз устунлигида бошланди ва дастлабки 10 дақиқаликда футболчиларимиздан Мафтуна Шойимова ва Шодия Тошевалар бир мартадан ғузорлик қизлар дарвозасига гол киритишди. Бу голларга Шоира Қултураева 11-дақиқада жавоб йўллашга муяссар бўлди – 2:1. Орадан икки дақиқа ўтиб, тажрибали футболчимиз Камола Рискиева орадаги ҳисобни 3:1га ўзгартирди. Шу ҳисоб билан биринчи бўлим якунига етди.

Иккинчи бўлимда ҳам футболчиларимиз ташаббусни ўз қўлларида ушлаб туришди. Ҳимояга катта эътибор қаратиб, асосан тўпни назорат қилишди. Ўйин шундай давом этаётган бир пайтда, тезкор ташкил этилган ҳужум гол билан якунланди. Бу голга Ильвина Аблякимова муаллифлик қилди – 4:1.

Бу ҳисоб деярли ўйин тақдирини ҳал қилган эди. Қолган дақиқаларда футболчиларимиз асосий эътиборини ҳимояга қаратишди. Ўйин тенг курашлар остида якунига етди.

Шундай қилиб, «Севинч» муддатидан аввал, мини футбол бўйича XIII Ўзбекистон чемпионлигини қўлга киритди. Бундай дейишимизга сабаб, эртага чемпионатнинг сўнгги учрашувлари бўлиб ўтади.

Албатта бу чемпионлик осонликча қўлга киритилгани йўқ. Владислав Хан бошчилигидаги мураббийларимизнинг катта меҳнати ва ҳаракатлари бу ютуқнинг асосий омилидир.

Эртага чемпионатнинг кумуш медал эгалари аниқланади. Бунга асосий давогарлар, Ғузорнинг «Шўртан Lady» ҳамда Тошкентнинг «ТАТУ» жамоаларидир. Бу икки жамоа эртага ўзаро баҳс юритади.

Жамоамиз чемпионатнинг сўнгги учрашувини, эртага Тошкентнинг «Юз работ» жамоаси билан ўтказади.

Мини футбол бўйича XIII Ўзбекистон чемпионати, 3-босқич, 4-тур

«Севинч» (Қарши) – «Шўртан Lady» (Ғузор) 4:1 (3:1)

19.03.2017. Тошкент ш., «Ёшлик» с/а

Ҳакамлар: Кристина Середа, Зилола Раҳматова, Людмила Гейгер, Маржона Раҳматқулова.

Голлар: Мафтуна Шойимова, 8′-1:0, Шодия Тошева, 8′-2:0, Камола Рискиева, 13′-3:1, Ильвина Аблякимова, 25′-4:1 – Шоира Қултураева, 11′-2:1.

«Севинч»: 1.Лайло Тилавова, 16.Мафтуна Жонимқулова, 8.Камола Рискиева (с), 17.Танзила Зарбиева, 11.Шахзода Жамолова, 10.Ильвина Аблякимова, 7.Шахноза Қурбонова, 25.Мафтуна Шойимова, 20.Мафтуна Панжиева, 27.Шодия Тошева, 9.Севара Нормуродова, 37.Малика Бурханова, 72.Нилуфар Қудратова, 19.Олия Ахмедова.

«Шўртан Lady»: 22.Сарвиноз Эргашева, 11.Фазилат Баҳрамова, 6.Зебо Жўраева (с), 19.Дилдора Эргашева, 18.Шоира Қултураева, 7.Улдона Тўхтаева, 3.Юлдуз Шодиева, 2.Мухлиса Мирзаёрова, 29.Жесика Кручинина, 1.Зарина Саидова.

Фоллар: 1-бўлим – 1:1, 2-бўлим – 3:1