Октябрь ойи Ўзбекистон терма жамоаси учун қанчалик омадли?

Биз терма жамоамизнинг октябрь ойидаги олдинги ўйинларини сизларнинг ёдингизга солишга қарор қилдик.

Ўзбекистон миллий терма жамоаси октябрь ойида жами 34 марта ўйин ўтказган. Шулардан 18 тасида ғалабага эришган. 8 та ўйинда рақиб билан муросага кўчаси танланган бўлса, 8 та учрашувда мағлубиятга учралган. Ушбу ойда 75 та гол урилган ва 54 та гол ўтказиб юборилган.

1992 йилда ушбу ойда учта ўйин ўтказилган. Ўрта Осиё кубоги доирасида бўлиб ўтган ўйинларда терма жамоамиз Қирғизистон устидан йирик 6:2 ҳисобида устун келган. Тошкентда Қозоғистон билан дуранг қайд этилган - 1:1. Бу ойдаги илк мағлубиятни ўша йили сафарда Туркманистондан қабул қилганмиз - 0:1.

Терма жамоамиз 1994 йилнинг октябрь ойида 7 та ўйинда қатнашган ва уларнинг барчасида ғалабага эришган! Сабаби Осиё ўйинлари мана шу ойда бўлиб ўтган. Терма жамоамиз ҳозирча ягона бўлиб турган чемпионликни октябрь ойида нишонлаган.

Биз учун тарихий бўлган Нигерияга қарши Тошкентдаги ўйинни ҳам 1995 йилнинг октябрь ойида ўтказганмиз. Ўша баҳсда жамоамиз аламли тарзда мағлуб бўлганди - 2:3.

1997 йилнинг октябрь ойида терма жамоамиз ЖЧ-1998 саралашида учта ўйин ўтказган ва уч хил натижага эришган. Япония билан дуранг (1:1), Жанубий Кореядан учралган йирик мағлубият (1:5) ва Қозоғистон устидан қўлга киритилган йирик ғалаба (4:0).

2000 йилнинг октябрь ойи терма жамоамиз учун ўта омадсиз келган. Ушбу йилда Ливанда бўлиб ўтган Осиё чемпионатига жўнаб кетиш олдидан Туркманистон ўртоқлик учрашувида йирик ҳисобда мағлуб этилган - 3:0. Аммо Осиё чемпионатининг ўзида вакилларимиз Қатар билан дуранг қайд этишган - 1:1. Кейинги иккита баҳсда рақибларга ўта йирик ҳисобда имконият бой берилган. Япониядан 1:8, Саудия Арабистонидан 0:5. Япониядан учралган мағлубият терма жамоамизнинг энг йирик мағлубияти бўлиб турибди.

ЖЧ-2002 саралашининг 2-гуруҳ босқичи сўнгги икки учрашуви 2001 йилнинг октябрь ойида бўлиб ўтган. Биз учун ўта аламли тарзда тугаган Уммонга қарши сафардаги баҳс (2:4) ва Хитой устидан сўнгги дақиқаларда Ширшовнинг аниқ зарбаси эвазига қўлга киритилган (афсуски кейинги босқичга чиқиш учун етарли бўлмаган) ғалаба - 1:0.

2003 йилда 11 октябрь куни БАА билан Дубайда ўртоқлик учрашувини ўтказганмиз. Ўша ўйин дуранг билан тугаган - 2:2. Кейинги йил октябрь ойида эса эса ЖЧ-2006 саралашининг 1-гуруҳ босқичи 5-турида Ироққа қарши Иорданияда бўлиб ўтган ўйинда ғалабага эришганмиз - 2:1.  
2005 йилнинг октябрь ойида аслида биз ўйин ўтказмаслигимиз лозим эди. Бироқ Тошимицу Ёшиданинг 3 сентябрь кунги Тошкентдаги "қилиқлари" сабабли ФИФА дастлабки ўйинни бекор қилган ва Баҳрайнга қарши ўйинларни октябрь ойида қайтадан ўтказишга қарор қилган. Тошкентдаги ўйинда 1:1 ҳисоби қайд этилган бўлса, Манамада ҳисоб очилмаган ва Баҳрайн плей-оффга йўл олганди...

2006 йил 11 октябрь кунида Ўзбекистон Осиё чемпионати-2007 саралаши доирасида Бангладеш меҳмони бўлган ва йирик 4:0 ҳисобида зафар қучган. 2007 йилда эса ЖЧ-2010 саралашининг илк босқичида Хитой Тайпеига қарши иккита ўйин ўтказганмиз. Тошкентда бўлиб ўтган дастлабки ўйинда терма жамоамиз ЖЧ саралашларидаги энг йирик ғалабасини қўлга киритган - 9:0. Жавоб баҳсида эса майдон эгалари 2:0 ҳисобида таслим этилган.   

2008 йил октябрь ойида Миржалол Қосимов Ўзбекистон миллий терма жамоасини илк марта бош мураббий сифатида майдонга олиб тушган. Дастлаб Жанубий Кореяга қарши сафарда ўртоқлик учрашуви ўтказилган ва йирик ҳисобда имконият бой берилган - 0:3. Аммо ЖЧ-2010 саралаши 3-гуруҳ босқичи 3-турида Япония майдонидан дурангга эришиб қайтилган - 1:1.

Осиё чемпионати-2011га тайёргарлик жараёни вақтида Вадим Абрамов шогирдлари 2010 йил октябрь ойида иккита ўртқолик учрашувида майдонга тушишган. Саудия Арабистонига йирик 0:4 ҳисобида имконият бой берилган бўлса, Баҳрайн майдонида 4:2 ҳисобидаги ғалабага эришилган.

2011 йил октябрь ойида ЖЧ-2014 саралаши 3-гуруҳ босқичи 3-турида сафарда КХДР устидан Александр Гейнрихнинг ягона голи эвазига зафар қучгандик - 1:0.  

Ўтган йили эса октябрда иккита ўйин ўтказилган. Дастлаб 12 октябрда БААга қарши Дубайда ўртоқлик учрашуви ташкил этилган. Унда жанговор дуранг қайд этилган – 2:2. Вакилларимиз сафида Санжар Турсунов ва Сервер Жепаров гол уришган. ЖЧ-2014 саралаши доирасидаги Қатарга қарши сафардаги ўйин ҳам ўтган йил октябрда бўлиб ўтганди. Ўшанда Санжар Турсуновнинг учрашув бошида урган голи Ўзбекистоннинг ғалабасини таъминлаганди – 1:0.

Қуйидаги жадвалдан кўриниб турибдики Ўзбекистон терма жамоаси охирги марта октябрь ойида ўз майдонида 2007 йил ўйнаган. Орадан 6 йил ўтгач яна терма жамоамиз бу ойда Тошкентда ўйин ўтказади. Ушбу учрашувда йигитларимизни қўллаб-қувватлашга барчани чорлаймиз!


Қуйида Ўзбекистон терма жамоасининг октябрь ойидаги барча ўйинлари келтирилган:
 

Сана	Майдон эгаси	Меҳмон жамоа	Ҳисоб
16.10.2012	Қатар	ЎЗБЕКИСТОН	0:1
12.10.2012	БАА	ЎЗБЕКИСТОН	2:2
11.10.2011	КХДР	ЎЗБЕКИСТОН	0:1
12.10.2010	Баҳрайн	ЎЗБЕКИСТОН	2:4
09.10.2010	Саудия Арабистони	ЎЗБЕКИСТОН	4:0
15.10.2008	Япония	ЎЗБЕКИСТОН	1:1
11.10.2008	Жанубий Корея	ЎЗБЕКИСТОН	3:0
28.10.2007	Хитой Тайпеи	ЎЗБЕКИСТОН	0:2
13.10.2007	ЎЗБЕКИСТОН	Хитой Тайпеи	9:0
11.10.2006	Бангладеш	ЎЗБЕКИСТОН	0:4
12.10.2005	Баҳрайн	ЎЗБЕКИСТОН	0:0
08.10.2005	ЎЗБЕКИСТОН	Баҳрайн	1:1
13.10.2004	Ироқ	ЎЗБЕКИСТОН	1:2
11.10.2003	БАА	ЎЗБЕКИСТОН	2:1
19.10.2001	ЎЗБЕКИСТОН	Хитой	1:0
13.10.2001	Уммон	ЎЗБЕКИСТОН	4:2
20.10.2000	Саудия Арабистони	ЎЗБЕКИСТОН	5:0
17.10.2000	Япония	ЎЗБЕКИСТОН	8:1
14.10.2000	ЎЗБЕКИСТОН	Қатар	1:1
08.10.2000	ЎЗБЕКИСТОН	Туркманистон	3:0
25.10.1997	ЎЗБЕКИСТОН	Қозоғистон	4:0
18.10.1997	ЎЗБЕКИСТОН	Жанубий Корея	1:5
11.10.1997	ЎЗБЕКИСТОН	Япония	1:1
20.10.1995	ЎЗБЕКИСТОН	Нигерия	2:3
16.10.1994	ЎЗБЕКИСТОН	Хитой	4:2
13.10.1994	ЎЗБЕКИСТОН	Жанубий Корея	1:0
11.10.1994	ЎЗБЕКИСТОН	Туркманистон	3:0
07.10.1994	ЎЗБЕКИСТОН	Тайланд	5:4
05.10.1994	Гонконг	ЎЗБЕКИСТОН	0:1
03.10.1994	ЎЗБЕКИСТОН	Малайзия	5:0
01.10.1994	Саудия Арабистони	ЎЗБЕКИСТОН	1:4
25.10.1992	Туркманистон	ЎЗБЕКИСТОН	1:0
14.10.1992	ЎЗБЕКИСТОН	Қозоғистон	1:1
03.10.1992	Қирғизистон	ЎЗБЕКИСТОН	2:6

 


Нарзулла Сайдуллаев