Ҳусниддин Ғофуров: “Дебют ўйинимдан қониқдим”

Қувонарлиси ҳамюртимизнинг дебют ўйини омад ли чиқди. Сабаби иваницаликлар шу куни гарчи сафарда ўйнаган бўлишларига қарамай, “Спартак”ни 2:0 ҳисобида мағлубиятга учрата олди. Бошланғич таркибдан жой олган Ҳусниддин иккинчи бўлимда бош мураббий томонидан бошқа бир футболчига алмаштирилди.

Мазкур учрашувдан сўнг, Ғофуров championat.asia сайтига махсус интервью берди.

- Салом, Ҳусниддин! Аввало Сербия премьер лигасидаги дебютингиз ва унинг омадли якун топгани билан табриклаймиз.  

- Раҳмат.

- Бу сизнинг “Явор” сафидаги дастлабки расмий ўйинингиз эди. Таассуротлар қандай?

- Дебютим омадли чиққани кайфиятимни кўтаргани аниқ. Қолаверса шу куни сафардан уч очко билан қайтишга эришдик. Биринчи расмий ўйиним бўлганлиги учун баҳснинг дебочаси мен учун озгина ҳаяжонли тарзда ўтди. Аммо аста-секин ўйинга киришиб кетдим.

- Мураббий ўйиндан сўнг нима деди? Ҳаракатларингиздан кўнгли тўлдими?

- Ҳа, яхши. Бу борада ортиқча эътирозлар бўлмади. Шундай экан ўйинимдан қониқиш хосил қилган кўринади.

- Богича Богичевич сизни қайси чизиқда ўйнатди?

- Мураббий шу куни мени қанот ярим ҳимоясига қўйди. Ўнг ва чап қанотларда ҳаракат қилдим.

- Илгари асосан ҳужумчи сифатида ўйнагансиз. Янги позицияда ўйнаш қийинчилик туғдирмаяптими?

- Озгина қийналяпман. Чунки ўзингиз яхши биласиз, бунгача асосан номинал ҳужумчи сифатида ўйнар эдим. Лекин умид қиламанки, янги позицияга ҳам кўникиб кетаман ва мураббийнинг кўрсатмаларини тўлиқ бажариш учун бор кучим билан ҳаракат қиламан.

- Бош мураббий сиздан кўпроқ нимани талаб қиляпти?

- Қанот ярим ҳимоячиларининг асосий вазифаси олдинги чизиқдаги жамоадошларини тўп билан таъминлашдан иборат. Шу боис Богичевич ҳам табиийки мендан кўпроқ тўп узатишларни талаб қилади.

- Шахсан ўзингизни биринчи расмий ўйинингиздан кўнглингиз тўлдими?

- Ҳа, дебют баҳсимдан ўзим ҳам қониқдим. Ўйлайманки ёмон таассурот қолдирмадим. Лекин камчиликларим ҳам бисёр. Бунинг учун машғулотларда тинимсиз ишлашим кераклигини жуда яхши англаб турибман.

- Жамоадошларингизнинг далдаси қандай бўляпти?

- Футболчиларнинг барчаси майдонда ва унинг ташқарисида катта ёрдам бермоқда. Дебют ўйинимда ҳам улар мени қўллаб-қувватлашди.

- Жамоангизда энг кучли футболчи ким?

- Ҳаммаси ўзига яраша футболчилардир. Улардан бирортасини аълоҳида ажратиб кўрсатиш қийин.

- “Явор”да жамоавий ўйин шаклланганми ёки бирорта футболчининг ўйинига боғлиқми?

- Албатта, жамоавий ўйин биринчи ўринда.

- Кейинги учрашувларда ҳам бошланғич таркибдан жой олиш имкониятингизни қандай баҳолайсиз?

-Бу борада олдиндан бир нима дейиш қийин. Бир сўз билан айтганда, 50х50.

Исломбек Рустамбеков суҳбатлашди.