Анвар Ўринов: "Ўз ўйинимизни топиб олиш учун озгина вақт керак"

Унга Насим Шоимов мураббийлар штабида яқиндан ёрдам бермоқда. Бу жамоа учун мавсум омадли келди деб бўлмайди. Ўз майдонида "Гулистон" ва "Зомин"га қарши кечган баҳсларда жамоа қимматли очколарни бой берди. Буни сабабини билиш мақсадида жамоа устози Ўриновга мурожаат қилдик.

- Мавсумни бу тарзда омадсиз бошлаймиз деб албатта ўйламагандик. Ўтказилган икки ўйиндан чиқиб шуни айтишим мумкинки, футболчиларим ҳалигача тўлиқ спорт формага кириб олмади. Қолаверса мавсумга тайёргарлик ҳам анча кеч бошланди. Устига устак бир нечта асосий ўйинчиларимиз "Футбол-МEД" кўригидан муваффақиятли ўта олишмади. Шу боис Тоҳир Абдураззоқов, Обид Маматов каби етакчи ўйинчиларимиз дастлабки турларда жамоамизга ёрдам бера олмади.

Умид қиламанки улар сафга қайтса ўйинимизда ўсиш бўлади.

Умуман олганда "Гулистон"га қарши баҳсда гол уриш учун бир қатор имкониятларни юзага келтира олдик. Аммо улардан оқилона фойдаланишга келганда йигитларга аниқлик етишмади.

"Зомин" билан ўйинда ҳам шогирдларим яхши ҳаракат қилди. Аммо бу учрашувда ҳам сўнгги дақиқада гол ўтказиб юбориб, тайёр ғалабани қўлдан чиқардик.

Мен қўл остимдаги йигитларга ишонаман. Чемпионат энди бошланди. Турдан-турга ўйинимиз яхшиланиб боради деган умиддаман.

Олдимизда турган энг асосий вазифа аввало юқори саккизталикка кириш. Шунингдек мухлисларга ёқадиган ўйин кўрсатиш.