11 dec 17:55
News

Абдумалик Абдуллаев: «Гай «Навбаҳор»ни биринчи лига жамоасига айлантириб қўйганди»

Наманганнинг «Навбаҳор» жамоаси шарафини ҳимоя қилиб келаётган ҳужумчилардан бири Абдумалик Абдуллаев тезкорлик борасида ҳар қандай енгил атлетикачини ҳам ортда қолдириши мумкин.
Гарчи ҳужумчи майдонда тезкорлиги билан ажралиб турсада, имкониятлардан фойдаланиш борасида Абдуллаевга совуққонлик ва аниқлик етишмайди. Айнан унинг тезкор ҳаракатларини кўрган мураббийлар футболчини ўз таркибларига қўшиб олишга уриниб кўришади. Ўтган вақт давомида ҳужумчига «Насаф» ва «Нефтчи» клублари қизиқиш билдирганди. Бироқ, Абдумаликнинг «Навбаҳор» билан амалдаги шартномаси борлиги боис Намангандан кета олмаганди. Жорий йилги чемпионатда футболчи атиги битта гол билан чекланди. Агарда ҳужумчи юзага келтирилган имкониятларни ҳеч бўлмаганда ярмидан самарали фойдаланишни уддалаганида ҳам голлари сони анча салмоқли бўларди.

- Абдумалик, якунига етган чемпионатда ҳужумчи бўлишингизга қарамай, битта гол билан чекландингиз. Мавсум қандай тассурот қолдирди?
- Якунланган чемпионат анча қийинчилик туғдирди. Жамоамиз оғир мавсумни бошидан ўтказди десам муболаға бўлмайди. Олий лигада эгаллаган ўрнимиз қониқарсиз бўлгач, иштирокимиздан кўнгил умуман тўлмади.

- Ҳужумчи учун тўққизта атиги битта гол паст кўрсаткич саналади. Бу натижадан кўнглингиз тўлдими?
- Йўқ, албатта. Чемпионат давомида мураббийлар деярли имконият беришмади. Жамоага Нўъмон Ҳасанов келгач эса асосий таркибда майдонга тушишни бошладим. Ҳасанов келгунга қадар мураббийларимиз имкон беришганида, голларим сонини ошириб олишим ҳам ҳеч гап эмасди деб ўйлайман.

- Ҳар йили асосий таркибдан жой олиш учун курашасиз. Аммо, бу вазифани мукаммал бажаролмайсиз. Бунинг сабаби нимада?
- Ҳар бир мураббий албатта барча футболчиларга ўзини ижобий тарафдан кўрсатиш учун имконият яратиб беради. Бу борада менга ҳам имкониятлар яратиб берилди. Балки омадсизлик туфайли зиммамдаги вазифани мукаммал тарзда ато эта олмаётгандирман.

- Бошқа жамоалардан ҳам таклифлар борми?
- Ҳа. Чемпионат якунига етгач, 2-3 жамоадан таклиф олдим.

- Сир бўлмаса қайси клублардан таклиф тушди?
- «Олмалиқ» ва «Нефтчи» клублари қизиқиш билдиришган.

- Сиз ҳам «Навбаҳор»ни молиявий ҳолатига қараб қарор қабул қиласизми?
- Ўзимга қўйиб берса жамоадан кетишни истамайман. Фаолиятимни туғилиб ўсган шахримда давом эттириш тарафдориман. Барчасини вақт кўрсатади. Воқеалар ривожи қандай тус олиши ҳозирча номаълум.

- Катта тезликка эга эканлигингизни биламиз, бироқ кўп ҳолларда ҳужумларни гол билан якунлай олмайсиз. Нима учун шундай бўлади?
- (кулади) Шу савол ўзимни ҳам қийнайди. Баъзан бўш дарвозага ҳам тўпни жойлай олмайман. Рақиб таъқибидан қочиб, якуний нуқтани қўйишга келганда омад юз ўгирмоқда.

- Буни омадсизликка йўйганингиз билан, аммо «омад кучлиларга кулиб боқади» деган ибора бор. Балки айб биргина Сизда эмас мураббийдадир?
- Йўқ. Мураббийлар доимо тўғри йўл-йўриқ кўрсатиб, керакли кўрсатмаларни беришади.

- Якунига етган мавсумда «Навбаҳор»га яхши натижа кўрсатиш учун нима етишмади?
- Назаримда молиявий масаладаги қийинчиликлар, чемпионатни юқорироқ ўринларда якунлашимизга имкон бермади.

- Мавсум давомида жамоада Асқаралиев, Гай ва Ҳасанов каби мураббийлар ҳам иш юритишди. Айтингчи, улардан қай бири жамоага кўпроқ фойда келтирди?
- Роберт Сергеевич хабарингиз бор, биринчи лига вакили «Чуст-Пахтакор»дан таклиф этилди. Айнан шу ҳол жамоа аъзоларини мушкул аҳволга солиб қўйди. Гайнинг юқори лигада муносиб тарзда ишлаши учун тажрибаси камлик қилди деб ўйлайман. Ушбу омил ҳам кўрсатган натижаларимизга таъсир этди. Қолаверса, мураббий таркибни ёшартираман деб ўз шогирдларини жалб эта бошлади ва жамоани қийин ахволга солиб қўйди. Бу гапларни аслида гапирмаслигим керак эди. Гай «Навбаҳор»ни биринчи лига жамоасига айлантириб қўйганди. Асосий таркибнинг айрим тажрибали ўйинчиларини ёшлар сафида шуғулланишлари борасидаги қарорни ҳам айнан шу мураббий қабул қилганди. У кетгач, маълум вақт давомида ёшлар сафида юрган жамоадошларим ўзларини нималарга қодир эканликларини намойиш этишди. Уларни кимлигини айтмас ҳам кўпчилик гап қайси футболчилар ҳақида кетаётганлигини пайқаб олишади.

- Жамоадошингиз Аюбхон Ғаппаров ўз интервьюсида Косонсойдаги майдон ҳолатидан норози бўлганини айтди.
- Жамоадошимнинг гапида жон бор. Лекин, футболчи майдон танламаслиги лозим. Спортчига маошини тўлангандан сўнг айтилган жойда тўп тепиши шарт. Намангандаги марказий ўйингоҳ фойдаланишга топширилгач, уй учрашувларимизни қадрдон ўйингоҳимизда ўтказамиз. Мухлисларимизга янги мавсумда ижобий натижалар ва ёрқин ўйинлар намойиш эта оламиз деб ўйлайман.

- Янаги мавсумда нечта гол урмоқчисиз?
- Агарда Нўъмон Ҳасанов кейинги мавсумда ҳам жамоада қолса, иложи борича кўпроқ гол уришга ҳаракат қиламан. Бу йил ўйин амалиётига кам эга бўлдим. Шу сабабдан майдонда кўпроқ ҳаракат қилсам, иложи борича мураббий ишончини оқлашга уринаман.

- «Бунёдкор»ни Анвар Ғофуров, Жасур Ҳасанов ва Лутфулла Тўраевлар тарк этиб, «Локомотив» сафини тўлдиришди. Кейинги йилда ушбу жамоалар яна чемпионлик учун асосий рақобатчилар бўлишади чоғи. Бу борадаги фикрингиз қандай?
- Ҳозирги кунда бу жамоалар мамлакатимизнинг етакчилари саналишади. «Насаф»ни ҳам улар қаторига киритиш мумкин. Лекин, бу йилги мавсумда чемпион номи сўнгги турларда аниқланганини инобатга олиб айтадиган бўлсам, чемпионатимиз йилдан-йилга қизиқарли тарзда тус олиб бормоқда. Шунинг учун олдиндан бирон жамоани ажратиб кўрсатиш ҳам ноўрин.

- Абдумалик Абдуллаевни шу даражага етишишида қайси мураббийнинг ҳиссаси катта бўлган?
- Футболдаги илк сабоқларимни биринчи устозим Александр Ляндан олганман. Шу сабабдан бундай даражага етишимда Александр Николаевичнинг ҳиссаси катта деб ўйлайман.


Жавлон Маҳмудов суҳбатлашди.
Манба: “Аср футболи” газетаси.
Rating:    

Comments

< show latest news
������.�������

Press "Like"
to read CA at facebook